TANESCO INANUKA UBADHIRIFU: Wezi, waharibifu wapewa zabuni za mabilioni

Shirika la Ugavi  Umeme Nchini (Tanesco), limetoa zabuni yenye thamani ya zaidi ya Sh. bilioni1.9 kwa kampuni ya McDonald Live Line Technology inayomilikiwa kwa ubia na Mkurugenzi Mtendaji wa shirika hilo na mfanyakazi aliyefukuzwa.

Mtumishi huyo wa Tanesco alifukuzwa kazi kwa tuhuma za upotevu wa zaidi ya Sh milioni 100, kuharibu gari la ofisi, kutowajibika kazini na utoro.
a
Mbia huyo alitimuliwa Julai 1999 akihusishwa  na kashfa kadhaa ikiwamo ya kuharibu gari la Tanesco namba TZD 2944. Hata hivyo aliiingia kwenye ubia wa makubaliano na mmojawapo wa wakurugenzi wa Tanesco Julai 17, 2008 ambaye baadaye aliteuliwa kuwa mkurugenzi mtendaji wa shirika hilo.

Taarifa hizo zimo kwenye Ripoti ya Mdhibiti na Mkaguzi Mkuu wa Hesabu za Serikali  (CAG) kuhusu ukaguzi wa mashirika ya umma ya mwaka wa fedha 2011/2012 iliyotolewa bungeni na pia kusambazwa kwa wadau mbalimbali.

Ukaguzi wa CAG unaeleza kuwa kuanzia 2009 hadi 2011 McDonald Live Technology, kampuni ya mfanyakazi wa Tanesco aliyefukuzwa ambaye haikumtaja, ilipewa mikataba mitano ya zabuni kadhaa zilizohusu:

UKARABATI, KUTENGENEZA NJIA YA UMEME
Mkataba ulitolewa Desemba 2008 wa kujenga njia ya umeme hai wenye kilometa 35 huko Mtibwa kwa gharama ya milioni 73.0, lakini hata hivyo wakaguzi wa CAG hawakuonyeshwa nyaraka za zabuni hiyo.

KUKARABATI NJIA YA UMEME
Mei 2009 McDonald alipewa zabuni ya Sh milioni 110 ya kukarabati njia ya Nordic ya msongo kilovolti 33. “Mkataba ulitekelezwa bila kuwepo dhamana ya benki kama zabuni zinavyoelekeza.”


UKARABATI MSONGO WA KV 66
Mnamo Machi 11, 2010 kampuni hiyo ilikuwa na zabuni ya kukarabati njia ya umeme ya Kiyungi-Arusha yenye msongo wa kilovolti 66 kwa gharama ya Sh bilioni 1.4

“Kazi ilitakiwa kukamilika Machi 2011 lakini haikumalizika ikaongezewa muda hadi Julai 2011 lakini ilikwama na kuongezewa muda hadi Novemba 2011 lakini bila mafanikio “
                                                                                                                                                                                    
Ilisema ripoti ya CAG na kuongeza kuwa Juni mwaka jana Tanesco ilivunja mkataba na McDonald wakati ambao ilikuwa imevuna zaidi ya milioni 475 za malipo ya awali.

Ripoti iliongeza kuwa Tanesco ilifanya uthamini na kuitaka kampuni hiyo kuirejeshea zaidi ya Sh milioni 504 faini, fidia na dhamana lakini hadi taarifa hii inawasilishwa bungeni fedha hiyo ilikuwa haijalipwa.

Zabuni nyingine ni ukarabati wa njia ya umeme ya Ifakara ya kilovolti 33 kuanzia Kidato hadi Mahenge na njia ya Mtibwa kutoka Mkundi hadi Mvomero yenye kilovolti 33 pia kwa gharama ya Sh milioni 338.2 .

CAG anabainisha mkataba mwingine kuwa ni wa matengenezo na ukarabati wa njia za umeme wa moto za Mzakwe Dodoma zenye kilovolti 33 kila moja.

“Kutokana na ukaguzi ni wazi kuwa McDonald alipewa kazi mikataba na Mkurugenzi Mkuu wa Tanesco kulingana na ubia kati yake na mmiliki wa kampuni hiyo kama sehemu ya pili ya makubaliano iliyompa jukumu la kutafuta kazi za kampuni hiyo” ilisema ripoti ya CAG.

UKAGUZI WA RUSHWA
“Tanesco imegubikwa na ukiukaji uliokithiri wa sheria na kanuni za manunuzi unaosababishwa na viongozi wa juu na wa kati wa shirika, Mkurugenzi Mkuu akiwa ndiye mwenye mamlaka ya juu ya manunuzi kushindwa kuzuia ukiukwaji wa sheria kwani mara nyingi aliidhinisha manunuzi ya zabuni ya chanzo kimoja ama yaliyozuia ushindanishaji wa kizabuni.”

WIZI WA UMEME
CAG anasema Tanesco haina kumbukumbu za kuaminika na taarifa sahihi za mita za umeme zinazotumika na mashine za kuuzia umeme zilizosambazwa nchi nzima .

Mkaguzi anataja pia kuwa shirika hilo halina pia kumbukumbu za kuonyesha kiasi cha uniti za umeme kilichotolewa kwa mawakala wauza umeme sehemu mbalimbali. Tena halina kumbukumbu ya idadi za uniti za umeme ilizokusanya kutoka kwa wauzaji.

“Ni udhihirisho wa kuwepo ukiukwaji wa usimamizi wa mifumo ya fedha , kanuni na udhibiti mapato wa ndani” alisema mkazi na mdhibiti katika ripoti yake.