Raia wa Malawi washikiliwa na Polisi

Jeshi la Polisi Kanda Maalumu Dar es Salaam, linawashikilia raia sita kutoka Malawi wanaosadikiwa kuishi bila kibali nchini.

Kamanda wa polisi Kanda Maalumu, Suleima Kova, alisema Aprili 27 huko Mbezi Beach Kinondoni, eneo la miti mirefu  askari wakiwa katika doria walifanikiwa kuwakamata raia hao wakiwa kwenye nyumba moja.

Aliwataja raia hao ni Sam Saka (24), Peter Jaston (29), Pres Magombe (25), pamoja na ndugu watatu Musa, John, na Nesta Chilwa  (30), ambao taratibu za kisheria zinafanywa ili kuchukuliwa hatua stahiki.

Pia  alisema watuhumiwa wengine  59, wanashikiliwa na jeshi hilo kwa kosa la kukutwa na silaha mbili,  bastola moja pamoja na risasi 26, Mei 2 huko eneo la Buza kwa Lulenge Ilala, baada ya askari wa  kituo cha StakiShari kufanya msako na kuwatia nguvuni.

Alisema watuhumiwa hao walikuwa wakifanya uhalifu wa ujambazi katikati ya mji kwa kutumia  pikipiki aina ya  Boxer  namba  T992 CHZ, T 517 CCV, na SUNLG namba T 801 CCW, pamoja na gari  T200CAG.

“Majambazi hao wanatumia  silaha  kama SMG, Short GUN, zikiwemo zile za kivita, kwa kufanya uhalifu, na idadi kubwa ya uhalifu wanaoufanya ni kupora watu  simu, fedha na komputa mpakato”alisema Kova.

Alisema katika hatua nyingine jeshi hilo limefanikiwa kukamata vitu mbalimbali ikiwemo pombe haramu ya gongo lita 240 eneo la Kigamboni.

Pamoja na hayo alisema watuhumiwa wengine sita wanashikiliwa na jeshi hilo kwa kujihusisha na vitendo vya uhalifu ambao ni Juma Ally (20), Hamis Hassan (18) wakazi wa Tumbi, Mohamed Junga (21), Asha Hassan (30) wakazi wa Ferry, pamoja na Silvestar Nailon (19) mkazi wa Magogoni.