Dk.Shein-Maalim Seif alipendekeza jina lake kuwa Makamu wa Rais

Rais wa Zanzibar Dk Ali Mohamed Shein amesema alipokea jina la Maalim Seif Sharif Hamad kutoka Chama cha CUF ili kuliteua kuwa Makamu wa kwanza wa Rais Zanzibar mwaka 2010 baada ya kuwa mshindi wa pili wa nafasi ya urais.

Dk Shein ametoboa siri hiyo juzi wakati akihutubia mkutano wa hadhara wa CCM uliofanyika huko Nungwi Mkoa wa Kaskazini Unguja juzi.

Alisema inashangaza wanapojitokeza baadhi ya watu wanaotaka  kuwatisha wenzao wakifikiri kuwa hata watakapovunja sheria serikali itawahofia, kuchekea na kuwatazama kwa macho.
Alieleza kwamba  kama Rais wa Zanzibar aliyechaguliwa na wananchi hana mtu anaemuogopa ila hupenda kuongoza kwa kufuata na kuheshimu misingi ya sheria za nchi na kufuata dhana ya utawala bora wa sheria.

Aidha, Dk. Shein alisema waliingia katika  kinyang’anyiro cha kuwania urais wa Zanzibar jumla ya  wagombea watano lakini kwa bahati nzuri, Tume ya Uchaguzi  Zanzibar ilimtangaza yeye ni mshindi kupitia CCM na kula kiapo cha  kulinda na kutetea katiba na sheria.

“Nilimwita Maalim Seif Sharif Hamad na kumtaka alete majina ya watu toka chama chake walioteulwa ili kuwa Makamo wa Kwanza wa Rais,akaniambia ameteuliwa yeye, nikamwambia nenda kaniandikie uniletee kwa maandishi, likaja jina lake tu nikamteua,” alisema Dk Shein.

Hata hivyo Rais huyo wa Zanzibar aliasa kuwa vyama vya hiari vya kijamii, NGO na jumuiya nyingine zikiwamo za dini ambazo zimesajiliwa kwa mujibu wa sheria zisimamie ipasavyo malengo ya kusajiliwa kwake.

Alisema si busara kwa jumuiya au chama cha  kisiasa kufanya kazi za dini au za dini zikafanywa ni za kisiasa na kuwataka wanaofanya hivyo kuacha kufanya hivyo kabla mikono ya sheria haijawakamata.

Aliwataka wanachama wa CCM kujiandaa toka sasa ili kupata ushindi mwaka 2015 kwasababu wana kila sababu ya kushinda kutokana na kutekeleza vizuri ahadi na kusimamia ilani ya uchaguzi ya chama hicho.